歐聯：後防穩健前線一擊搞掂 阿仙奴勇銳KO床單軍_東方日報

歐聯聯賽階段第3輪，兩戰全勝嘅英超豪門阿仙奴，主場迎戰西甲勁旅馬德里體育會。阿仙奴近年喺阿迪達帶領下，歐洲賽表現突飛猛進，鋼鐵防線已達世界頂尖，前鋒線就一次機會即可KO對手，加上「兵工廠」近年專剋西甲球隊，上盤讓一球都照撐。（Now 638周三凌晨3時直播）文:工廠仔

阿仙奴上屆歐聯勇闖4強，今屆目前兩戰全勝兼未失1球，有愈戰愈勇之勢。「兵工廠」能夠有穩定嘅表現，源自一條銅牆鐵壁防線，今季11場比賽只係失過3球。後面能夠盡量做到唔失波，前線只要把握一次機會、甚至一次招牌角球攻勢得手，已經有好大機會可以贏波而回。

馬體會作客易失波
相反，昔日以鐵血防守見稱嘅「床單兵團」馬德里體育會，教練施蒙尼近期轉玩搶攻踢法，球隊穩定性即大不如前，馬體會喺歐聯頭兩輪失咗4球只得1勝1負，失波問題喺作客尤其明顯，佢哋今季5場作客不勝，而且場場都有失球，造訪氣勢如虹嘅阿仙奴，睇怕都凶多吉少。

阿仙奴嘅強大控制力，面對西甲崇尚進攻嘅球隊甚有優勢，「兵工廠」近6次喺歐聯對西甲兵錄得全勝，包括上屆8強「雙殺」勁旅皇家馬德里，以及今屆首仗作客贏畢爾包，當中兩場主場分別贏3比0同2比0，贏得好有說服力，既然「兵工廠」對西甲兵咁有心得，今場必撐上盤。