歐聯：迪布尼領軍倒戈誓吐烏氣 曼城半大靠晒里_東方日報

今晚繼續有歐聯首輪大戰，當中曼城主場火併拿玻里話題十足，一對昔日好拍檔艾寧夏蘭特同奇雲迪布尼各為其主，尤其係被「藍月亮」放棄嘅迪布尼，話咁快就率領拿玻里重返昔日主場倒戈，梗係要踢場爭氣波；「藍月亮」啱啱喺打吡戰大勝重拾信心，預計兩軍一開波即駁火，捧1.5球半場大博早啲收錢。（Now 638周五凌晨3時直播）文:法達斯維

奇雲迪布尼效力曼城整整10年，期間6奪英超，並喺2023年首捧歐聯冠軍，絕對係「藍月亮」傳奇，可惜佢已經34歲兼近年傷患不斷，最終喺今夏被球會放棄。拿玻里見機不可失，成功免費簽入呢位中場大師，佢亦夠晒爭氣，頭3輪意甲已經射入2粒，協助球隊全勝登上榜首，連同早前為比利時征戰世盃外，迪布尼近5場狂轟5粒兼交出1次助攻，狀態弗到震，今仗重返佢最熟悉嘅曼城球場，連同麥湯米尼、海倫，甚至主帥干地等英超失意軍人，誓要打翻身仗一吐烏氣。

曼城季初已受到傷兵困擾，馬莫殊及卓基等「十字軍」預料繼續缺陣，但日前打吡戰大派曼聯3蛋，王牌艾寧夏蘭特梅開二度，連同早前世盃外，呢位射手今季各項賽事6場狂入11粒，簡直着晒火，今場重遇昔日好拍檔迪布尼，都想證明冇咗佢嘅穿針引線，自己一樣搵到食。

「藍月」重建期防線要磨合
不過「藍月亮」正處於重建期，各方面都仲需要時間磨合，尤其係由攻轉守一刻，容易露出空位畀對手有機可乘，之前輸畀白禮頓同熱刺有辦你睇，防守唔算好穩陣，若然拿玻里趁對手未企穩陣腳，喺進攻上花啲心思，隨時早段搵到甜頭。睇番雙方近3次交手，半場全開2球或以上，睇得出雙方一開波就嚟料，半場大捧得過。