外圍賽：葡萄牙搶韁半大愛得過_東方日報

戰神C朗爭入波無人能擋
世界盃外圍賽歐洲區F組，葡萄牙主場迎戰愛爾蘭，榜首葡萄牙兩戰兩勝，合共轟入8球，單計C朗已有3球進帳，可見呢位40歲射手寶刀未老，有力繼續數胡，向職業生涯1,000球大關進發。至於愛爾蘭僅1分在手，為保持出線希望，惟有豁出去一博，預料雙方將會迅速展開駁火，參考葡萄牙近3場上半場總入球全開2球或以上，一於再追中位數1.5球嘅半場大。（周日凌晨2時45分開賽）文:Mic少

葡萄牙實力喺F組鶴立雞群，首場大炒阿美尼亞5蛋，跟住贏匈牙利3比2，C朗兩場都有波入，呢位「不老戰神」日前出席葡萄牙環球頒獎禮，領取榮譽大獎時，揚言未有退役計劃，想再踢多幾年，明顯希望職業生涯入夠1,000球，現時距離目標只差54球，佢一定把握所有比賽機會全力爭取入波。

葡軍除咗C朗之外，祖奧菲歷斯、拉菲爾利亞奧、般奴費南迪斯等中前場球員都具備出色入球能力，要攻入愛爾蘭大門，並唔困難。事實上，葡萄牙之前兩場世盃外都係作客，仍然入到8球，今仗有地利優勢，攻勢肯定更加猛烈，上半場入波機會甚高。

愛爾蘭冇退路焗攻
另邊廂，愛爾蘭兩戰只有1和1負排包尾，如果今場再輸，出線機會就非常渺茫，背水一戰之下，冇退縮空間，明知實力唔及葡萄牙，亦要焗住搶攻。前鋒艾雲費格遜今季被白禮頓外借去羅馬後，雖然表現一般，但踢國家隊往往有不俗發揮，喺上月兩場世盃外都取得入球，有力威脅葡萄牙防線，1.5球半場大博得過。