英超：倫敦打吡 車仔踩油速擒富咸_東方日報

今晚英超頭場上演「倫敦打吡」，車路士主場迎戰富咸，「車仔」上仗大勝韋斯咸5比1，祖奧柏度狀態大勇，加盟車路士以來，踢5場正式賽事射入4球及2次助攻，恐怕富咸防線難以招架，相信「車仔」有力迅速領先，直取半場主勝。

（Now 621及611周六晚7時30分直播）文:Mic少

車路士開鑼戰僅悶和水晶宮0比0，上仗作客韋斯咸，主將高爾彭馬突然因傷缺陣，反而獲得大勝，皆因祖奧柏度墮後，扮演彭馬進攻中場角色，效果奇佳，射入1球及2次助攻，經此一役，相信領隊馬利斯卡已搵到新進攻模式。

事實上，車路士鋒線猛將如雲，18歲新星艾斯迪華奧上仗貢獻助攻，加上柏度尼圖、利安戴納同比諾傑坦斯都具備級數，正選位置競爭激烈，有得上陣必搏盡爭取入波。包括世冠盃在內，「車仔」近5場正式賽事有4次上半場領先，可望再次速戰速決。

客軍質素差一截
至於富咸整體人腳質素較弱，開季後2場聯賽都打和，包括同曼聯踢成1比1。考慮到「紅魔鬼」陷入低潮，就算富咸取得分數，亦唔代表可以同車路士抗衡。翻查雙方近4次聯賽交鋒，「車仔」取得3勝1負，當中3次上半場領先，半場主勝值得追捧。