英超：「離間計」搞亂紐卡素軍心 利物浦搶Ｗ繼續狠_東方日報

今晚英超壓軸大戰，紐卡素主場硬撼利物浦。今仗焦點無疑係「喜鵲」王牌阿歷山大伊沙克決心過檔利物浦，搞到同球隊反目成仇，隊內軍心大亂，加上近年聯賽碰頭「紅軍」食住對手，仲唔趁你病攞你命咩，客勝咪錯過。（Now 621及611周二凌晨3時直播）文:法達斯維

紐卡素今夏最爆新聞，梗係射手伊沙克扭計要去利物浦，仲鬧爆球會「違背承諾」，有指係球隊應承佢加人工或畀佢走人，點知兌現唔到。不過「喜鵲」重申無意將佢賣走，期間利物浦的確有報過價，但未達標就收手，之後食住花生「睇戲」。依家伊沙克拒絕上陣，「喜鵲」又買唔到代替品，安排安東尼哥頓踢「假9」亦冇料到，前線死晒火，隊內士氣麻麻，連同季前熱身賽，佢哋近7場未贏過，上場踢多個都只能悶和維拉，絕對雙輸局面，唔理有心定無意，利物浦呢招「離間計」確係收效。

炮台眾多火力全開
「紅軍」喺今夏轉會窗大事增兵，新兵艾基迪基與域斯極速融入，幫王牌穆罕默德沙拿分擔唔少進攻壓力，首輪以4比2擊敗般尼茅夫，艾基迪基同沙拿都有波入，費達歷高基艾沙後備落場更攻入關鍵入波，火力全開，就算右閘謝利美費林邦因傷倦勤亦冇有怕。何況利物浦食慣「喜鵲」，近8次聯賽碰頭「紅軍」錄得7勝1和，擺明格食格，再贏唔奇。