日職：三箭齊發射爆勝利船_東方日報

日職前列大戰，廣島三箭主場火併神戶勝利船，現時兩隊同分，僅落後榜首京都不死鳥2分，為保持爭標機會，今場「6分波」不容有失。論狀態廣島三箭佔優，各項賽事近6場取得5勝1和，反觀神戶勝利船遭遇2連敗，表現高下立見，廣島三箭主勝值博。

(無綫myTV Super周三晚6時直播)

雙線作戰應付自如
廣島三箭近期聯賽及日皇盃雙線作戰，一樣應付自如，兩項賽事近6仗5勝1和，當中5場保持不失球，可以話係攻守兼備。就算單計近4場日職都有3勝1和，當然要食住個勢贏埋爭標勁敵神戶勝利船。三箭中場中村草太腳風非常順，近3次上陣射入2球，加上前鋒木下康介亦頻頻建功，相信要攻入勝利船大門，並唔困難。

至於神戶勝利船繼作客0比2不敵町田澤維亞之後，上仗主場對護級球隊FC橫濱，都以0比1敗陣，勢必嚴重打擊士氣，遇上強隊廣島三箭，情況更加唔樂觀，預料屆時會捱打，三箭主勝超過2倍，回報高值博。此外，雙方近6次對賽有5次總入球開出2球或以下，中位數2.5球嘅入球細亦值得考慮。