英超：限米煮限飯勢擺鐵桶 富咸半和頂住般茅_東方日報

周六凌晨英超獨腳戲，般尼茅夫主場對富咸。「般茅」今夏出售多名主力，但表現並無走樣，近5場聯賽更錄得3勝2和保持不敗；富咸上場作客領先下遭阿士東維拉反勝，為避免連敗今場肯定擺定鐵桶，佢哋近4場3次開半場和，相信半場頂得住，一於捧半場和。

（Now 621周六凌晨3時直播）文:邪神

般尼茅夫今夏幾乎賣晒成條後防線，甸恩胡積臣轉投皇家馬德里、米路斯卻基斯亦過檔利物浦、同埋薩巴尼爾加盟巴黎聖日耳門，個個都飛黃騰達，球會亦收取咗一筆巨額轉會費。

般茅全新防線依然硬淨
般茅聯賽開鑼戰以2比4輸畀利物浦，今季前景被睇淡，但事實並唔係咁，由法甲新簽中堅巴科迪迪亞基迪同左閘阿祖安杜法特快速融入，球隊防線仍然穩固，聯賽5場不敗，證明經得起考驗。鋒線方面，安東尼施美安季初狀態神勇，6場聯賽交出4入球2助攻，包辦球隊大部分入球，但呢個情況有利亦有弊，由於進攻過度集中喺一人身上，只要對手部署得宜施予嚴密看管，就可以大大減低「般茅」威脅。

富咸今季增兵不斷碰壁，到夏窗關閉前先簽入巴西翼鋒奇雲山度士，而該新兵至今仍未交出表現，球隊幾乎沿用上季人腳作戰，暫時成績不過不失，守住中游位置，主帥馬高施華最擅長限米煮限飯，知道唔夠對方打就實行拖字訣守住先，尤其上場剛不敵維拉，今場戰術就更加消極，加上佢哋近期頻開半場和，值得再追。