美洲金盃：墨西哥當洪細不可當_東方日報

美洲金盃4強展開！兩場準決賽戲碼，都係神奇球隊挑戰傳統班霸。洪都拉斯淘汰近年冒起嘅巴拿馬，與墨西哥爭入決賽，墨西哥靠穩健防守致勝，今屆3勝1和，其中近3場開2球或以下，預料洪都拉斯對住強隊，亦唔敢太過急進，今場入波唔會多，揀2.5球入球細。（無綫myTV SUPER周四早上10時直播）文:渡邊年

墨西哥一向以防守見稱，分組賽階段只失2球，去到8強亦係零封沙地阿拉伯，以2比0贏波，亦係4場8強入面，唯一一場唔使射12碼嘅比賽。墨西哥戰術一針見血，靠前面嘅魯爾占美尼斯同阿歷西斯域加去湧，有睇開英超嘅球迷，大概都會明白，墨西哥踢法係點。

美國弗爆等開入球騷
洪都拉斯8強戰憑互射12碼淘汰巴拿馬，耗力不少。洪都拉斯喺法定時間入過5球，全部來自不同球員，球隊欠缺進攻重心，好難咬得入墨西哥，今場相信會出現拉鋸局面，投注選擇最好係入球細。

至於美國主場鬥危地馬拉，危地馬拉射贏12碼淘汰加拿大，係球隊自1996年以嚟，再次入準決賽。美國近4場入10球，今場足以摧毀危地馬拉防線，佢哋近7場6次開3球以上，推介2.5球入球大。